南非 & 納米比亞旅遊記

因為我老公嘅關係，近呢幾年我多咗好多機會同時間去探索神秘又遙遠嘅非洲大地。除咗睇咗好多好美麗嘅景色，見到好多動物，認識到世界另一邊嘅文化，亦發現有好多身邊嘅親戚朋友都對呢一片土地有好多好奇同有時都幾九唔搭八嘅問題。

係香港嘅我哋，好多時候都對非洲有種刻板嘅印象：好窮乜都無、啲細路仔好瘦但啲肚腩好大、啲人仲食緊樹皮、淘寶生日片⋯⋯雖然唔可以話係完全唔啱嘅，但係其實非洲除咗有獅子老虎，都有幾多同我哋印象中好不一樣，甚至係意想不到嘅嘢 - 例如非洲都有白人 a.k.a. 我老公。

既然係咁，我就決定又用一個平台去紀錄同分享一下我係非洲見到同學習到嘅東西，等大家都可以隔住個MON咁去睇下非洲究竟係點樣㗎啦！

Follow me on @alexathejanvdm

🦩納米比亞的紅鶴

去沙漠之前，我哋首先去咗海岸度睇Flamingo(Flamink 紅鶴)。呢度嘅Flamingo全部都係野生，個樣唔似我哋係九龍公園睇到嗰啲咁有勁Sharp嘅粉紅色。原來呢度嘅Flamingo分咗兩個品種，一種係食蝦嘅Greater Flamingo 大紅鶴（顏色淺啲），一種係食海藻嘅Lesser Flamingo 小紅鶴（顏色深啲），體形同習性都唔同，令佢哋可以係納米比亞共存。

#南非#南非旅遊#southafrica #非洲#非洲旅遊 #suidafrika #旅行 #旅遊日記

呢個Account主要係用嚟紀錄我係南非/納米比亞嘅見聞，俾香港嘅朋友認識吓我呢個Second Home。但我本身嘅工作其實係紋身同畫畫。今日我就用Afrikaans去講吓我嘅工作 - tatoeëerkunstenaar （Tattoo Artist)。

不知不覺間呢件衝動嘅事就做咗4年，又認識到好多好好嘅人，亦俾咗我好多滿足感！

📍Harties, South Africa

Harties（正式名字係Hartbeespoort），係一個喺Pretoria 30 分鐘以外嘅小鎮。因為位於水壩隔離，背山面水，風景優美，所以係一個當地人近近哋去休閑放鬆嘅地方（好似我哋去赤柱Hea咁）。
第一次去南非，我哋有一個星期時間係Joburg/Pretoria度遊覽，老公於是就揸車帶我去Harties睇下風景。

Harties嘅最大特色就係佢個纜車🚡，個Feel就好似海洋公園咁，全程都只係大概5分鐘左右就上咗山了，不過要同其他人Share坐。當日我哋兩個同咗丹麥嚟嘅一家四口Share一部纜車，可能因為我係亞洲人，所以對面兩個6，7歲嘅妹妹對我好��好奇，好搞笑。

上到山就可以望到成個Harties嘅景色，對住大海，旁邊就係幾座大山。因為係遊客景點，所以山上有酒吧餐廳、紀念品，俾大家望住個海Chill。行咗個圈我哋就坐返纜車落山了。
纜車門票係成人R325 (HKD $150左右) ，小朋友 R215（HKD $100左右），生日免費！

落咗山之後我哋就沿住水壩揸車欣賞下景色，其中會經過一道羅馬式建築嘅拱門，係當地嘅地標，不過除此以外overall個感覺都幾似去咗城門水塘咁樣。

然後我哋就約咗係嗰邊住嘅朋友嚟咗餐廳搵我哋。除咗餐廳之外，呢啲旅遊小鎮就當然仲有啲Market仔行下啦，食完嘢可以順便買下手信，咁就完咗輕鬆嘅一日了。

#南非#南非旅遊#southafrica #非洲#非洲旅遊 #suidafrika #旅行 #旅遊日記

拍Afrikaans片都幾Fun，同埋為咗講多啲，我��決定一星期拍兩次先！

學Afrikaans嚟講，文法其實都幾簡單，但最難嘅真係要記字。可能因為佢哋嘅農夫背景，令到佢哋有好多字嘅起源九唔搭八得嚟又好Make Sense。今日我就講咗幾樣：
1. Rooster - 串法同英文Rooster公雞一樣，但原來佢係燒烤爐
2. Kameelperd - 照譯係駱駝馬，點知原來係長頸鹿
3. Luiperd - 懶馬，佢其實係花豹
4. Jagluiperd - 打獵的懶馬，即係獵豹（R曬頭？）

然後仲有Seekoei 海牛（唔係真係海牛）、Perdeby 馬烏蠅、Spinnekop 旋轉頭⋯⋯你又估吓係乜？

隻隻動物對改名嗰條友嚟講都係馬，真係有啲癡線。不過學習呢個語言嘅過程中都令我感覺到佢哋務農為主嘅民族背景，都幾得意。

#afrikaans #leer #suidafrika #語言 #南非 #納米比亞 #southafrica

📍Kruger National Park, South Africa

來南非零距離觀察野生動物
這是我們第一次在Kruger巧遇的動物朋友🦒🐘🦌🐾
甚至看到極罕見的非洲野狗太幸運了！

#南非 #納米比亞 #非洲 #旅行 #南非旅遊 #非洲旅遊 #旅遊景點 #深度遊 #krugernationalpark #kruger

🦟💚ZAMBUK 搽得上咀嘅蚊膏

呢個嘢細細粒但唔好睇小佢，佢簡直係南非嘅標誌！
諗諗下好似每個國家都有種標誌性嘅藥膏，香港係Tiger Balm，南非就一定係Zambuk。

呢種綠色嘅藥膏氣味清新，無論係蚊叮蟲咬，甚至嘴唇乾燥都可以用佢，而其實香港人都有機會見過！？

係啊，我第一次用佢嘅時候心諗，陣味咁熟嘅？原來除咗南非，Zambuk係泰國都好出名，唔知你哋又認唔認到佢？原來好多南非人都唔知，Zambuk嘅原創地係英國而唔係南非，佢係一種係1902發明嘅藥膏。但佢係南非嘅深入民心嘅程度，令佢係南非嘅包裝上面寫上咗“”Zam-Buk the Real Makoya“”呢句Slogan, Makoya 係南非係指“”Real Deal“”嘅意思。

我哋亞洲人好少將呢隻「蚊膏」搽上個咀，所以第一次我都覺得有啲奇怪，但依家我直頭係Can‘t live without it! 南非每個都只係4 rand左右，加上每次都淨係要用少少，真係超抵用。

我屋企仲有zambuk嘅衫同襪，係咪好Cute呢！

#南非#非洲#納米比亞#旅旅#旅行#自由行 #深度遊 #遊記 #旅行

🗣️My gunsteling Afrikaans gesegdes

第二個星期拍片講Afrikaans。今日分享三個我最鍾意用嘅句子：

1. Agge Nee Man - 解釋：OH NO！/ 死火喇！
🕺🏻呢句係我第一句學嘅句子。唔知係咪佢中間啲””G””發音好似起痰咁，我覺得讀起上嚟好有真係「奶嘢」嘅感覺，所以我成日都好鍾意大叫呢句說話。

2. Magie vol ogies toe - 解釋：肚仔飽飽就要咪埋眼
🍴我一食飽飽就會講呢句，相信大家都明點解唔洗我解釋啦！

3. Boer maak ‘n plan (Die vrou maak twee) - 解釋：農夫點都會諗到方法（但佢老婆可以諗多一個）
👨🏽‍🌾因為係南非嘅白人好多都係荷蘭嘅後裔，佢哋嚟到南非最主要都係做農夫，所以南非嘅荷蘭白人都會叫自己做Boer（農夫）。佢哋呢個民族自古就刻苦耐勞，而呢句說話嘅意思就係講緊無論發生咩事都好，佢哋都會諗到方法，又或者指佢哋萬事都有準備。而�當然，一個成功嘅男人梗係要聽老婆話啦！

#afrikaans #leer #suidafrika #語言 #南非 #納米比亞 #southafrica

🍽️餐桌上的文化衝擊🍽️

世界各地對於「食」都有唔同嘅文化，作為土生土長嘅香港人，大家都想像到我哋去到南非，係食呢一方面一定會有唔少文化衝擊，今日我就講吓令我感受最深有邊幾樣啦！

1.食飯前要飲嘢吹水先 🗣️
香港人好講求效率，所有野都要快靚正，連食飯都會限時。但去到南非，每次出街食飯都唔會好似香港人咁一開波就由頭盤嗌到甜品，而係會先每人叫一杯嘢飲，等嘢飲嚟再傾計傾到咁上下先會叫嘢食。
呢樣習慣對於我呢個超心急嘅人係好大挑戰，因為對於係肚餓嘅時候唔嗌嘢食，仲要傾咁耐計，開頭都真係會燥燥地，心諗點解可以有咁多嘢傾架。但時間耐咗，我就發現係因為香港同南非嘅生活節奏、出街食飯嘅文化好唔同。係香港我哋好急好忙，有咩就講，大部分時間都以效率為先，就算係Social，好多時候都會有一啲目的，唔識嘅人我哋都唔會好主動分享或者去認識對方。但呢度嘅飯前傾計，係等大家深入啲認識大家，或者去聽下彼此最近嘅生活係點。好多時候我發現佢哋會咁長氣，成日講咁耐嘢，係因為佢哋好想你明白佢哋講緊乜嘢，所以佢哋會舉好多事例，分享好多經驗，問大家好多問題等等。

2. 去親邊度都要俾Tips💰
香港食完飯埋單都會有加一服務費，南非雖然無加一，但就有貼士文化。我老公話如果個侍應服務還好佢就會俾10%，再好啲就會俾15%，真係頂級超卓就會俾20%或更多。而除咗餐廳侍應，基本上任何提供服務嘅人，包括停車場嘅指揮人員、景點嘅導遊、表演人員、司機、油站工作人員，我哋都會俾貼士。
南非大部分人嘅收入都好低，即使少少嘅貼士其實可以幫到佢哋嘅生活好多。對於香港人嚟講，呢啲錢真係好少，而大部分侍應都會招呼得我哋好好，比起香港，連無服務嘅餐廳都必收加一服務費，係南非都俾得舒服啲。

3. 成日都要燒嘢食 🍖
Braai，即係燒嘢食，係南非好重大嘅飲食文化。基本上呢度嘅人一年四季，無野做又好，大時大節都好，都會整個火爐，燒下柴，坐埋一齊Braai。每一次返南非，晏晝落完機到埗，夜晚個餐就一定係喺屋企Braai。每人一塊扒，再整個Braaibroodjie🥪（燒嘢食必整三文治），大家坐埋一齊食嘢同吹水。
我哋Honey Moon嗰一個星期，每一晚嘅晚餐都係Braai，雖然凍凍哋有個火爐燒住，晚晚都鋸扒係幾正嘅，但我呢啲亞洲人體質都feel到個人勁熱氣，真係唔知佢哋無涼茶係點樣頂得住的。

4. 飲白酒加冰 🍷
我唔多飲酒，但因為爸爸做咗廿幾年酒店同鐘意飲酒嘅關係，佢都有略略教下我關於白酒紅酒嘅東西。雖然我對酒嘅認知真係好皮毛，但第一次睇到奶奶係白酒度加冰我係好震撼的。因為係我嘅認知入面，紅酒白酒都係要慢慢Dap，又唔似Whiskey咁強烈，加冰就會溝淡咗原本白酒嘅口味，咁咪浪費咗支酒！？不過可能只係爸爸無教過我，我又好少飲酒。之後我發現原來如此好多南非人都會咁樣做的，學到嘢。

5. 侍應好Nice 😊
頭先提到南非嘅貼士文化，南非人本身都好好客有善，而因為貼士佢哋都會更落力去服務客人。餐廳會劃分每一位侍應嘅工作區，所以通常由帶位、落單、上菜都會由同一位人員負責。侍應們都會介紹自己，大部分態度都會親切有禮，對於慣咗茶餐廳文化嘅香港人，真係會有啲唔知點應對，但都令我反思，無論食嘢定返工，或者日常待人接物，開開心心禮禮貌貌其實都幾好啊。

#南非 #南非旅遊 #納米比亞 #非洲 #旅遊 #旅行 #非洲旅遊 #旅遊景點

📍Table Mountain, South Africa

⛰️Table Mountain 係南非嘅地標，因平坦嘅山頂而命名，高度係海拔1,086米。有時係山頂會有一層白色嘅霧氣，當地人就會稱之為Table Cloth。

我哋由Joburg到Capetown嘅飛機就正正係Table Mountain 嘅上空盤旋。落機後嚟到親戚係Blouberg嘅屋企，我哋可以由鄰近嘅沙灘遠遠眺望，非洲嘅黃昏映襯住平坦嘅山嶺，兩日之後我哋就要爬上呢座大山。

記得當日因為怕太遲會無位泊車，所以朝早五點鐘我哋就要起身，放完啲狗屙臭臭💩之後就出發上山。要上Table Mountain有2個方法 —— 行上去或者搭纜車，年輕力壯嘅我哋就當然選擇行上去啦。上山嘅路線有好多選擇，當時嘅男朋友簡咗一條唔簡單嘅路線： India Venster Route，全程大概3個鐘，中間有唔少部分都要手腳並用咁爬上去。我對行山無乜特別興趣，嗰陣仲要啱啱先腳傷復原，行咗頭15分鐘樓梯已經想縮沙，但難得一場嚟到最後都決定頂埋佢。
過咗樓梯之後就開始係草叢同沙石路，路勢闊闊窄窄，行嘅時候都要幾小心。係我哋旁邊有一個德國Family，跟住領隊同我哋一齊行呢條路線，我哋順便偷聽下領隊講乜，原來不知不覺間我哋已經行到去同格離Lion’s Head一樣嘅高度 (海拔669米)。

跟住就大獲喇，前面啲人無啦啦排隊，原來我哋依家要沿住個石牆爬上去，石上面雖然有裝置咗啲扶手同繩索俾我哋拉住，但要跨上去嗰一步都幾大，最後要手腳並用咁撐自己上去。正當我思考緊人生嘅時候，望一望身後，有兩個七十幾歲嘅Uncle Auntie係度等緊我，我於是決定要咬緊牙關，急急腳爬上去，真心有一下覺得自己會跣腳跌死，好彩無事。

慢慢我都習慣咗山嘅路勢，其實除咗之前要爬下石，之後嘅路都唔係特別難行。係山上面會見到好多唔同嘅植物，配合埋朝早嘅陽光，真係好似入咗童話故事書咁。行吓行吓我哋就到咗山頂，當日我哋好好彩，雖然山上風都係好大，但未到好危險或者好唔舒服，時常有霧罩住嘅山頂，當日都十分清澈，行到山崖邊仲可以飽覽到CapeTown嘅景色，城市同海岸都一一映入眼簾。
正當我係崖邊睇住風景，勁驚跌死嘅時候，我當時嘅男朋友就突然跪低左，跟住我就無咗個男朋友了😱💍！！

落山我哋簡咗搭纜車，同纜車嘅仲有剛才德國一家人同佢哋嘅領隊，我就當然要Show下我隻新戒指啦。真係好好彩我哋咁早上嚟，因為雖然只係朝早十點鐘，但樓下排纜車嘅隊已經長到去車路了。人多到連我哋揸車走都有難度，人流密集程度直迫星期日嘅中環。

✨如果你能力許可，去到Cape Town必定要行一次上Table Mountain，個體驗同我哋係香港行山真係好唔同，風景氣候都十分宜人。如果能力唔許可，搭纜車都唔緊要嘅。
‼️不過上山前最好睇下當日氣溫同埋風勢，預備好適當嘅衣物同裝備，唔好行得咁近山崖。同時因為Table Mountain係熱門旅遊點，所以留意吓當地新聞，睇下會唔會有好多針對遊客嘅罪案嗰度發生啦。

#南非 #南非旅遊 #納米比亞 #非洲 #旅遊 #旅行 #非洲旅遊 #旅遊景點

🛒南非手信：擺得落口篇

去南非可以買啲咩手信？今次就等我介紹幾款隨街都執到，又平又有特色嘅南非手信啦！

☕️ Rooibos 博士茶 ☕️
講到南非就一定唔少得佢！Rooibos係以一種只會係南非生長，名為Aspalathus linearis的植物針葉製成，無咖啡因又高抗氧化，啱曬啲養生人士。
因為係國民飲品，雖然只係茶包，但佢哋都研發咗好多新口味。我個人大推Chai Tea Blend，勁香香料味！（西瓜薄荷is a 伏🤢）。
另外係Coffee Shop有時會見到佢哋賣”Red Cuppicino” - 其實就係Rooibos加奶泡，都幾Yummy㗎！

🥩 Biltong 🥩
即係牛肉乾，但佢哋呢種牛肉乾神奇之處係可以完全唔乾的。
因為南非氣候乾燥，所以佢地會將牛肉加好多香草醃料掛係度風乾，乾到咁上下就會切成一塊塊當零食咁食。平時去開超級市場嘅肉檔，又或者賣肉/Braai（燒嘢食）嘅鋪頭都會有。
我一直都以為買Biltong係撞彩，但原來你係可以同佢Request要Wet Biltong（即係濕啲，口感似生牛肉多啲）又或者乾啲（屋企雪櫃有一條，真係咬斷牙都未食到），同埋想要白色/黃色脂肪，出到嚟嘅味道都會有啲唔同。每次我地都會叫啲人真空俾我哋帶返香港。

🍑 Mrs. Balls Chutney 🍑
國民醬料！好似Jam咁嘅質地，係由杏桃同埋桃加埋香料一齊煮成嘅醬汁。食落去其實係甜甜地又辣辣地，其實個Concept係似食燒鵝嗰隻梅醬/泰國雞醬咁。可以整三文治嘅時候加，又或者食乜都加吓咁LOL。

🦁 Zimba Chips 🦁
私心大推Chutney味嘅Zimba薯片！食完第一次我係驚艷啊！係誇張嘅，但係唔知點解南非嘅薯片隻隻都好重口味，which我係欣賞嘅！特別係Zimba呢個牌子，我諗可以話佢哋係南非嘅卡樂B，係美味薯片嘅指標！

👵🏻 Ouma Rusks 👵🏻
係南非，每朝食早餐飲咖啡都會有一大個玻璃樽裝住啲一舊舊好似泥磚咁嘅東東。如果你就咁咬落去，又係咬到牙都爛都未咬到，因為佢係俾你浸住熱咖啡食的。
佢嘅起源就係以前啲人好窮，食淨咗嘅麵包會儲埋，乾咗之後就朝配咖啡，當早餐咁填住個肚先。時至今日，當然就唔再係過期麵飽啦，廠商甚至整咗個人設俾佢，就係Ouma，即係你啊嫲整嘅Rusks，有唔同口味同埋大細，配咖啡係幾Nice的！Lekker！

#南非 #南非旅遊 #納米比亞 #非洲 #旅遊 #旅行 #非洲旅遊 #旅遊景點

My first week speaking Afrikaans on video!

因為學緊南非話進步好慢，於是決定橫掂都介紹南非，就用埋呢個platform去練習，紀錄進度同埋mark下筆記！

發現又要寫稿又要練發音，過程中都真係記到好多字，例如一直搞亂嘅om & te 都好似清楚返少少。

#語言學習#afrikaans #外語學習 #南非 #南非語 #afrikaanslearning #language #languagelearning#southafrica #sa#suidafrika

📍Sandwich Harbour PT.2

上次講到，我哋係大沙丘爬返落嚟，聽埋導遊Franswa唱咗隻歌之後就繼續我哋嘅行程。

我哋繼續沿住海邊前進，Franswa突然愈揸愈快，駛咗去啲高低起伏嘅沙丘上面。吉普車沿住沙丘嘅高高低低愈駛愈高，眼前除咗沙就只有沙，向遠望就會見到藍藍嘅天空背景，好似行咗入Window桌面背景咁。

行到咁上下，Franswa又停低咗，原來係食飯時間。呢度嘅人可能習慣咗Road Trip，我發現即使旅程中嘅輕食，都好有儀式感。首先我無諗過呢啲半日團都會有嘢食，而就算有都諗住只係濕鳩三文治加支水咁就算數。點知Franswa係呢個時間居然拎咗張枱出嚟，仲有張花花枱布，講緊我哋唔係喺沙灘，係沙漠啊大佬！啲風吹到發發聲，都仲可以Set到枱！然後佢再拎咗兩盤食物出嚟，全部都係一啲好精緻嘅小食，唔係淨係菠蘿腸仔嘅Level，有肉串，有芝士Platter，各種Canapé。小冰箱入面又有汽水同啤酒，仲有熱水壺沖茶飲，點做到！？

不過因為風真係好大，同埋要把握時間日落前返到市區，我哋食完執完曬啲嘢又繼續出發。順帶一提，係納米比亞同南非，大家同大自然都有好深連結，所以係呢度每個人都好有意識唔會隨處拋棄垃圾或者為大自然帶來不必要嘅污染。

今日嘅戲肉係沙漠過山車。Franswa揸住佢架吉普車，由最高嘅沙丘衝落嚟，再兜嚟兜去，再衝—— 呢件事持續咗20分鐘。啲沙丘其實都真係幾高，當存車比油轟上去嘅時候，特別如果好似我咁坐後座，你唔會知道幾時先會下坡，而下坡嘅角度亦有機會會好斜，會有離心力，真係幾刺激。不過兜得耐又衝得多，事後傾返先知原來大家都有少少想嘔，好彩Franswa終於停低，今次我哋停咗係最高嘅沙丘上面。

四周嘅景物比之前睇嘅更加廣闊，加上超級大風，真係有啲驚企唔穩會跌落街。Franswa突然之間又叫我哋唔好郁，因為佢話佢見到有隻沙漠蜥蜴要捉俾我哋睇，橙色閃閃嘅外皮，眼仔碌碌咁望住我哋，好快佢就跳走咗。

回程嘅時候我哋繼續沿住沙丘行駛。雖然沙漠主要都係沙，但其實有啲位置都會有綠洲同植物生長，呢啲位置就會吸引到小動物嚟休息同搵食。聽到Franswa介紹我就俾心機望下會唔會睇到動物，點知真係俾我係一片草地旁邊留意到一個黑點，駛近啲就發現原來係一隻Jackal（豺狼）。我哋遠距離咁觀察，佢身上有啡啡灰灰嘅毛色，感覺到佢好休閑咁休息緊。跟住我哋就繼續回程，結束呢一次沙漠遊。

係回程嘅路上我坐咗係副駕位同Franswa傾計，交流吓我作為香港人嚟到納米比亞感受到嘅嘢。Franswa講到，佢細個對物理好有興趣，甚至夢想成為物理學家，但納米比亞生活實在太簡單同「與世隔絕」了，所以好難會有機會。言語間佢似乎好羨慕我哋係香港機遇處處嘅生活。睇返自己作為香港人，我哋的確係好多創業「做大事」嘅機會，除咗覺得好幸運之外，有時候亦會覺得生活簡單，少啲競爭，有空間去睇呢個世界嘅美麗，自在平安咁去感受生活，對好多城市人嚟講都係另一種奢侈。

#南非 #南非旅遊 #納米比亞 #非洲 #旅遊 #旅行 #非洲旅遊 #旅遊景點

📍Sandwich Harbour PT.1

今次我哋要去海洋同沙漠連接嘅地方🏜️🌊(Where the Desert Meets the Ocean)。

首先我哋由由德國小鎮Swapkomund 起程，揸20分鐘車去搵導遊Franswa，再跳上佢架吉普車，開始今日嘅旅程！

納米比亞沙漠有超過五千萬年的地質歷史，並擁有世界上最高嘅沙丘，沙漠遊因此十分熱門。
雖然上網可以搵到好多私家導遊帶你遊沙漠，但要搵到一個可靠又老實嘅導遊都未必咁容易，因為沙漠咁大，除咗容易蕩失路，導遊嘅駕駛技術都要好高超先可以避免係沙漠中壞車。我哋都好開心今次可以搵到有豐富經驗，說話幽默嘅Franswa帶我哋遊覽浩瀚嘅沙漠。

我哋係公路行駛，沿路經過鹽田，白雪雪嘅鹽堆到好似雪山一樣，同沙漠有強烈對比。路上愈來愈多沙塵，代表我哋離沙漠都愈來愈近。

到達沙漠地帶後，我哋沿住海皮駛往大沙丘所在嘅位置。沙灘上有好多海獅🦭訓係度休息，隻隻都肥嘟嘟幾cute，但間唔中都會見到啲發脹或者腐爛咗嘅海獅屍體。而望遠少少，我哋仲見到海中心跳起嘅海豚🐬。

駛入沙丘嘅途中我哋突然停低咗，原來Franswa想俾我哋睇下呢係沙漠中嘅骷髏頭💀。無人知道呢個頭骨係咩身世，但因為佢已經係度好耐所以都無人想郁佢，結果就成為咗沙漠嘅一個景點，為沙漠增添咗神秘嘅色彩。

過多一陣，我哋終於嚟到其中一個大沙丘面前，就咁望呢個大沙丘都有大概20幾米高。啲南非人突然就話要鬥快爬上去沙丘頂，雖然我無諗過無啦啦要做啲咁辛苦嘅嘢，但一場嚟到就唯有頂硬上。每行一步，啲沙就會跣返你半步，感覺好似爬極都爬唔完咁。佢地左右腳踩下踩下就上咗去，但我就係咁跣低，兩個大脾已經好攰了，最後決定亂咁爬，成個癲婆咁先爬到上頂。

上到頂之後望返落去，除咗有啲腳震震，頭先坐嘅吉普車都好似變咗做粒玩具咁。而放眼望下身邊嘅景物，一邊係一望無際嘅蔚藍大海，另一邊都同樣係一望無際，高低起伏嘅沙漠，耳邊就只有風聲同海浪聲，令人完全感受到大自然嘅強大。

由沙丘頂落返地下嘅過程相比之下輕鬆好多。臨上車去下一個景點之前，Franswa話佢想彈Ukelele唱隻歌，我哋幾個人於是就係無人嘅沙漠聽住佢唱歌。依家諗返依個畫面都幾浪漫。

之後我哋居然係沙漠玩過山車🎢⋯⋯待續

#南非 #南非旅遊 #納米比亞 #非洲 #旅遊 #旅行 #非洲旅遊 #旅遊景點

📍Spitzkoppe, Namibia

第一次去Namibia，我哋嘅第一個景點就係呢度：Spitzkoppe🌄！

由Winddoek嘅屋企出發，我哋揸咗6個鐘頭車，由公路行到沙石路，最後嚟到Spitzkoppe嘅營區。由於係沙漠地區，所以度度都沙塵滾滾，車上面都沾滿曬泥濘。

呢個營區雖然望落好似都係木屋仔咁樣，但係其實都一應俱全，有餐�廳，有Wi-Fi。跟住我奶奶係納米比亞蒲得多，就發現其實呢種營區都幾常見，主要係俾我哋呢啲自駕人士有個地方歇腳，第二日繼續起程。

Spitzkoppe係一個花崗岩山峰，經歷咗熔融岩漿冷卻同固化，加上天然侵蝕，產生咗佢呢一個咁奇特嘅模樣。雖然我地理知識好有限，但我想像到對地理有研究嘅朋友仔，係納米比亞應該可以發掘到好多新奇東西！

呢個營區坐落於Spitzkoppe旁邊。我哋每人都有一間Shed，係一個好大嘅帳幕，入面床同廁所都好企理（不過廁所無屋頂，放屁唔敢太大聲），當然都會有啲沙泥同埋昆蟲仔，但Overall都唔核突嘅。

通常係呢啲營區嘅餐廳都會有幾個選擇比我哋簡，而個日嘅晚餐我簡咗食Game meat - 即係當日打獵有嘅肉，通常都係鹿肉，同平時我哋食扒無乜分別。

襯住餐廳準備晚餐，奶奶同新老公就係車度帶埋支香檳，問餐廳拎咗啲冰同冰桶，我哋就去咗散步，爬咗上舊石度睇黃昏，太識嘆了。

係呢舊大石上面望住一片一望無際嘅土地，每一秒都變顏色嘅天空，我發現世界真係好大啊！！

#南非 #南非旅遊 #納米比亞 #非洲 #旅遊 #旅行 #非洲旅遊 #旅遊景點

🇳🇦納米比亞輕輕講🇳🇦

我由細都大都無聽過納米比亞呢個地方，第一次聽到心諗係咪阿努阿圖啲Friend，更加無諗過會有機會去，甚至有朝一日會搬過去⋯⋯

我奶奶由南非搬咗過去納米比亞，順便結埋個婚。因為佢哋兩公婆都好熱愛戶外活動，打獵、露營、Roadtrip等等，於是令到我哋經常有機會去納米比亞探險🚙！

係Joburg搭大約2個鐘頭機就可以去到納米比亞。納米比亞嘅面積係824,292 平方公里（香港嘅747倍），但佢哋人口就淨係2.5百萬人，係繼蒙古之後第二人口密度最低嘅國家！？真係見狒狒多過見人🐒。

納米比亞係沙漠國家，氣候乾燥。同南非一樣，納米比亞有好豐富嘅天然資源同埋自然景觀，例如海同沙漠融為一體��嘅Sandwich Harbour、勁大舊嘅奇怪石頭山Spitzkoppe、死亡谷Deadvlei等等。

而返到去城市化少少嘅旅遊小鎮Swakopmund，因為曾經被德國殖民統治過，你會見好好多德式嘅建築同好多啤酒🍻。

文化方面，其實納米比亞同南非好相似，最常用嘅係英文，其次係德文同埋 Afrikaans 南非荷蘭語，仲有一啲當地土語。而相對南非，呢邊物價會稍為高少少，亦都比南非安全好多。食物、買嘢之類其實都同南非無乜大分別，係啲人再Chill D同Friendly啲咁。

以上就係我大概諗到關於納米比亞嘅東西喇！我之後再同大家分享下有咩睇啦～

#南非 #南非旅遊 #納米比亞 #非洲 #旅遊 #旅行 #非洲旅遊 #旅遊景點

🇿🇦南非輕輕講🇿🇦

因為老公係南非長大嘅關係，我哋得閒就會返吓去見下啲朋友同屋企人。係我開始介紹啲Fun嘢之前，今日我就略略講吓南非嘅一啲資訊俾大家認識下啦！

南非 - 顧名思義即係南面嘅非洲。成個南非嘅總面積總係大概約 1,221,037 平方公里（即係香港嘅1107倍WTF），人口就6000萬左右。

如果我哋返去南非嘅話，我哋主要都係會去係Johannesburg鄰近嘅Pretoria。
Pretoria係南非嘅首都，位於內陸位置，平原比較多，而我地住嘅東區都相對比其他地方安全。
另外旅遊發展比較發達嘅就當然仲有處於地圖下方嘅開普敦CapeTown，沿海加上旅遊業旺盛，所以都係南非當地人/外國遊客嘅首選嚟嘅。

係南非你主要會見到黑人，但亦都有唔少白人同不同種族嘅人係個度居住，所以佢哋都叫自己做”Rainbow Nation”，係因為南非就好似Rainbow咁多種顏色。正因為咁，南非擁有11種官方語言，包括最常用嘅英文、Afrikaans 南非荷蘭語、Zulu 祖魯語、isiXhosa 科薩語等。
而睇返歷史，因為當時要搵人採礦、採甘蔗，令到有好多中國人、馬拉人、印度人嚟到南非，所以係佢哋日常生活中，特別係食物都可以見到亞洲嘅色彩㗎。

以上就係一個好略略嘅介紹，寫寫下發現原來真係好多嘢可以寫，我慢慢再分享啦Yeah！

#南非 #南非旅遊 #納米比亞 #非洲 #旅遊 #旅行 #非洲旅遊 #旅遊景�點

Hello 大家好啊！又係我Alexa喇！

因為我老公嘅關係，近呢幾年我多咗好多機會同時間去探索神秘又遙遠嘅非洲大地。除咗睇咗好多好美麗嘅景色，見到好多動物，認識到世界另一邊嘅文化，亦發現有好多身邊嘅親戚朋友都對呢一片土地有好多好奇同有時都幾九唔搭八嘅問題。

係香港嘅我哋，好多時候都對非洲有種刻板嘅印象：好窮乜都無、啲細路仔好瘦但啲肚腩好大、啲人仲食緊樹皮、淘寶生日片⋯⋯雖然唔可以話係完全唔啱嘅，但係其實非洲除咗有獅子老虎，都有幾多同我哋印象中好不一樣，甚至係意想不到嘅嘢 - 例如非洲都有白人 a.k.a. 我老公。

既然係咁，我就決定又用一個平台去紀錄同分享一下我係非洲見到同學習到嘅東西，等大家都可以隔住個MON咁去睇下非洲究竟係點樣㗎啦！Yeah！

#南非 #南非旅遊 #納米比亞 #非洲 #旅遊 #旅行 #非洲旅遊 #旅遊景點

.pro-gallery-wix-wrapper {display: block !important;} .pro-gallery-wix-wrapper .gallery-item-container {opacity: 1 !important; display: block !important;}

南非 & 納米比亞旅遊記

​